तरुणांनी छत्रपती शिवाजी महाराजांच्या इतिहासातून प्रेरणा घ्यावी -व्याख्याते वसंत हंकारे

तरुणांनी छत्रपती शिवाजी महाराजांच्या इतिहासातून प्रेरणा घ्यावी- व्याख्याते वसंत हंकारे 

 छत्रपती शिवाजी महाराज समतावादी, विज्ञानवादी, स्त्री स्वातंत्र्याचे पुरस्कर्ते होते. त्यांनी सदैव रयतेच्या हिताचे रक्षण केले. म्हणून तरुणांनी छत्रपती शिवाजी महाराजांच्या इतिहासातून प्रेरणा घ्यावी, असे प्रतिपादन प्रसिद्ध व्याख्याते वसंत हंकारे यांनी केले. समस्त मराठा समाज शिवजयंती उत्सव समिती दत्तवाड यांच्यामार्फत आयोजित केलेल्या व्याख्यान प्रसंगी ते बोलत होते.

ते पुढे म्हणाले, छत्रपती शिवाजी महाराज, राजमाता जिजाऊ, छत्रपती संभाजी महाराज यांचा आदर्श युवकांनी समोर ठेवावा. मातांनी राजमाता जिजाऊंप्रमाणे मुलांच्यावर संस्कार करावेत. आपल्या मुलांना घडवा त्यांना जपा हीच तुमची संपत्ती आहे. सासूने सुनेला व सुनेने सासूला आनंदाची मिठी मारली तर निम्मे प्रश्न सुटतील. मुलांनी देखील आई-वडिलांना मान खाली घालावी लागेल असे वागू नये. आई-वडिलांची मान उंचावेल असे काम करण्याचा सल्ला त्यांनी दिला. आज प्रत्येक घरातील स्त्रीने आपल्या मुलांवर योग्य संस्कार करण्याचे आवाहनही त्यांनी यावेळी केले. या व्याख्यानाला महिला, युवक, वृद्ध, नागरिक मोठ्या संख्येने उपस्थित होते.