शिरोळ बंधाऱ्याचे कायमस्वरूपी मजबुतीकरण करणार : आमदार राजेंद्र पाटील यड्रावकर

शिरोळ बंधाऱ्याचे कायमस्वरूपी मजबुतीकरण करणार : आमदार राजेंद्र पाटील यड्रावकर

 ५० लाखांचा निधी मंजूर, आणखी २.५० कोटींचा प्रस्ताव अंतिम टप्प्यात 

दत्तवाड : (मंदा देशपांडे)

पंचगंगा नदीवरील शिरोळ बंधाऱ्याच्या उजव्या तीरावरील संरक्षक भिंत पुराच्या प्रचंड पाण्याच्या दाबामुळे वाहून गेल्याने आमदार राजेंद्र पाटील यड्रावकर यांनी घटनास्थळी भेट देऊन नुकसानीची पाहणी केली. यावेळी त्यांनी पाटबंधारे विभागाच्या अधिकाऱ्यांना तातडीने सूचना देऊन बंधाऱ्यावरील पाणी ओसरतात तातडीने भरव टाकून धोकादायक भाग सुरक्षित करण्याचे निर्देश दिले तसेच बंधाऱ्याच्या दुरुस्तीसाठी ५० लाख रुपयांचा निधी मंजूर झाला असून उर्वरित कामांसाठी आणखी २ कोटी ५० लाखांचा प्रस्ताव अंतिम टप्प्यात आहे. हा प्रस्ताव लवकरच मंजूर होऊन दुरुस्तीच्या कामाला सुरुवात केली जाईल, अशी ग्वाही त्यांनी दिली.

गेल्या आठवड्यात कोल्हापूरच्या घाटमाथ्यावर झालेल्या मुसळधार पावसामुळे पंचगंगा नदीच्या पाणीपातळीत झपाट्याने वाढ झाली. नदीतून मोठ्या प्रमाणात वाहून आलेली जलपर्णी शिरोळ बंधाऱ्याला अडकल्याने मुख्य नदीप्रवाहाला अडथळा निर्माण झाला. परिणामी पाण्याचा प्रचंड दबाव बंधाऱ्यावर आणि त्याच्या संरक्षक भिंतीवर पडू लागला. जलपर्णी हटविण्यासाठी पाटबंधारे विभागाने जेसीबीच्या साहाय्याने प्रयत्न केले; मात्र पाण्याचा वेग आणि जलपर्णीचा मोठा गुंता यामुळे ही मोहीम अर्धवट थांबवावी लागली.

याच अतिरिक्त पाण्याच्या दाबामुळे ४ जुलै रोजी बंधाऱ्याच्या उजव्या तीरावरील अधोबाजूची संरक्षक भिंत वाहून गेली होती.

या पाहणीदरम्यान आमदार यड्रावकर यांनी पाटबंधारे विभागाच्या अधिकाऱ्यांशी सविस्तर चर्चा करून बंधाऱ्यावरील पाणी ओसरताच तातडीने भराव टाकून धोकादायक भाग सुरक्षित करण्याचे निर्देश दिले. त्यानंतर कायमस्वरूपी दुरुस्ती व मजबुतीकरणाची कामे युद्धपातळीवर हाती घेण्यात येणार असल्याचे त्यांनी सांगितले.

शेतकऱ्यांच्या सिंचन व्यवस्थेवर कोणताही परिणाम होऊ नये, यासाठी आवश्यक ती सर्व उपाययोजना तातडीने करण्यात येतील. शासनाच्या माध्यमातून जादा निधी उपलब्ध करून शिरोळ बंधारा पूर्वीपेक्षा अधिक मजबूत करण्यासाठी कोणतीही कसर ठेवली जाणार नाही, अशी माहिती आमदार राजेंद्र पाटील यड्रावकर यांनी यावेळी दिली.

यावेळी शिरोळचे माजी नगराध्यक्ष अमरसिंह पाटील, पाटबंधारे विभागाचे उपविभागीय अधिकारी प्रकाश येसणे, शाखाधिकारी आनंद गाडे, टेक्नीकल असिस्टंट सुमित डोंगळे आदी उपस्थित होते.